Еуро-2024 турнирінің В тобында өнер көрсететін Италия мен Хорватия құрамалары үшінші тур аясында кездесті. Тартысқа толы матчта италиялықтар соңғы минуттарда гол соғып, жеңілістің алдын алды, деп хабарлайды KAZ.NUR.KZ.
В тобының қос мықтысы – Италия мен Хорватия құрамалары "Ред Булл Арена" (Лейпциг Штадиум) стадионында кездесті.
Ойынның 54-минутында төрешінің VAR-ды тексеру нәтижесінде Италия құрамасының жартылай қорғаушысы Давидэ Фраттезидің қолына доп тигені анықталып, Доннарумманың қақпасына пенальти белгіленеді. Ал Хорватия құрамасының капитаны Лука Модрич пенальтиден мүлт кетеді.
Ал арада бір минут өтпей жатып, Хорватия құрамасы тағы шабуылдап, Лука Модрич өз дегеніне жетеді. Ойынның 55-минутында Анте Будимирдің соққысын қайтарған қақпашы Доннаруммадан кері серпілген допты Лука Модрич қақпаға тоғытады. Хорватия құрамасы 1:0 есебімен алға шықты.
Бірақ Италия құрамасы шабуылын күшейте түсті. Матч соңына дейін жанын салып ойнаған италиялықтар 90+8-минутта гол соғып, хорватиялықтарды сан соқтырып кетті. Гол авторы – шабуылшы Маттиа Дзакканьи.
Ойын 1:1 есебімен аяқталды.
Ал осы топта өнер көрсететін Испания мен Албания құрамалары үшінші тур аясында кездесіп, испаниялықтар 1:0 есебімен жеңіске жетті.
В тобының үшінші тур ойындарының нәтижесі бойынша Испания 9 ұпаймен, Италия 4 ұпаймен плей-оффқа тікелей жолдама алды. Ал Хорватия құрамасы 2 ұпаймен үшінші орынға жайғасты. Топтың соңғы орнын Албания құрамасы 1 ұпаймен еншіледі.
Айта кетейік, топтық кезеңде бірінші және екінші орын алған құрамалар, сондай-ақ әр топта үшінші орынды межелеген құрамалар арасында нәтижесі жоғары ең үздік төртеуі плей-оффқа жолдама алады.
Германиядағы Еуропа біріншілігінде 24 құрама бақ сынап жатыр. Топтық кезең 26 маусымға дейін жалғасса, плей-офф кезеңі 29 маусымда басталады.
Мақаланың түпнұсқасы: https://kaz.nur.kz/sport/football/2123277-euro-2024-italiia-quramasy-songgy-minuttarda-gol-sogyp-horvatiialyqtardy-san-soqtyrdy/
