Қазақстан футболындағы жаңа турнир Лига кубогының топтық кезеңі аяқталып, жартылай финалға өткен төрт команда анықталды. Бұл туралы KAZ.NUR.KZ тілшісі хабарлайды.
Турнирді 16 команда бастады. Оның ішінде Қазақстан Премьер лигасында ойнайтын барлық клуб пен Бірінші лиганың үш клубы бар. Олар төрт топқа бөлінді. Әр квартеттің жеңімпаздары плей-офф кезеңге өтті.
Жүлде үшін тартысты алматылық "Қайрат" (А тобында 1-орын), астаналық "Жеңіс" (В тобы), cемейлік "Елімай" (С тобы) және "Астана" (D тобы) командалары жалғастырады. Қазақстан футбол лигасы плей-офф кезеңінде ойнайтын жұптарды жариялады. Жартылай финалда "Елімай" клубы "Астанамен", ал "Қайрат" ұжымы "Жеңіспен" ойнайды.
Жартылай финал екі матчтық форматта өтеді. Бұл кезеңнің ойындары 10-11 тамыз бен 30 қазанға жоспарланған. Лига кубогының финалы 24 қарашада өтеді.
Айта кетейік, турнирдің жалпы жүлде қоры – бір миллион доллар. Бұл Қазақстан футболы үшін рекордтық көрсеткіш болып саналады.
Мақаланың түпнұсқасы: https://kaz.nur.kz/sport/football/2137689-zhulde-qory-1-mln-dollar-qazaqstan-futbolyndagy-zhanga-turnirding-zhartylai-finalisteri-anyqtaldy/
