Франция астанасы Париждегі "Шатле" театрында "France Football" журналының нұсқасы бойынша жылдың үздік ойыншысына "Алтын доп" жүлдесі табыс етілді. Осыған орай KAZ.NUR.KZ тілшісі "Алтын доп" жүлдесін соңғы 24 жылда жеңген футболшылар туралы мәліметті ұсынады.
Бұл тізімдегі футболшылардың реттілігі 2001 жылдан 2007 жылға дейінгі кезеңді қамтиды. Бұдан кейін 2018, 2022, 2024 жылғы жеңімпаздарға тоқталамыз. Ал біз атап өтпеген жылдары Криштиану Роналду (2008, 2013, 2014, 2016, 2017) мен Лионель Мессидің (2009, 2010, 2012, 2015, 2019, 2021, 2023) футболдағы ең беделді жүлдені өзара сарапқа салған.
2001. Майкл Оуэн (Англия)
"Алтын доп" жүлдесін ХХІ ғасырда алғаш рет жеңіп алған футболшы ретінде оның есімі тарихта қалды. 2000/01 маусымында англиялық "Ливерпуль" клубы сапында бірқатар жүлдені жеңіп алды. Оның ішінде УЕФА кубогы (Еуропа лигасының ескі атауы), сонымен қатар Англия премьер-лигасының үздік сұрмергені атанды. Осы көрсеткен нәтижелері үшін ол "Алтын доп" жүлдесін еншіледі.
2002. Роналдо (Бразилия)
Тізе жарақатына байланысты ұзақ мерзім бойы алаңға шықпаған Роналдо 2002 жылы үлкен қадам жасады. Сол жылы Роналдо әлем чемпионы атанып қана қоймай, турнирдің үздік сұрмергені атағын жеңіп алды. Негізі ол "Алтын доп" жүлдесін 1997 жылы еншілеген болатын. Бірақ ол 2002 жылы өз мансабында үлкен серпіліс жасап, мадридтік "Реал" клубында жасындай жарқылдап, "Алтын доп" жүлдесін екінші мәрте иеленді.
2003. Павел Недвед (Чехия)
Павел Недвед 2003 жылы Италия чемпионаты мен Суперкубогын жеңіп алды. Бірақ оның ең үлкен жетістігі – "Ювентус" сапында УЕФА Чемпиондар лигасының финалына дейін шығуы еді.
2004. Андрей Шевченко (Украина)
Сол жылы Андрей Шевченко Италия чемпионаты мен Суперкубогында топ жарды. Сондай-ақ содан бір жыл бұрын УЕФА Чемпиондар лигасының финалында "Милан" сапында Павел Недведтің командасынан айласын асырып кеткен болатын.
2005. Роналдиньо (Бразилия)
Бразилиялық "сиқыршы" "Барселонамен" бірге Ла Лигада жеңіске жетіп, клуб тарихындағы жаңа кезеңнің бетін ашқан болатын.
2006. Фабио Каннаваро (Италия)
Фабио Каннаваро – осы мыңжылдықта "Алтын допты" жеңіп алған жалғыз қорғаушы. 2006 жылы Фабио Каннаваро "Ювентус" сапында Италия чемпионы, Италия құрамасымен әлем чемпионы атанды.
2007. Кака (Бразилия)
Бразилиялық футболшы Кака сол жылы УЕФА Чемпиондар лигасын жеңіп алып, жылдың ең үздік ойыншысы атанды. Содан кейін ол мадридтік "Реал" клубына ауысқан болатын.
2018. Лука Модрич (Хорватия)
Лука Модрич – Месси мен Роналдудың он жылдық гегемониясын бұзып, "Алтын доп" жүлдесін жеңген жалғыз футболшы. Модрич Роналдумен бірге "Реал" сапында ойнаған. Осы жылғы УЕФА Чемпиондар лигасындағы жеңісі мен маусымдағы керемет ойыны Лука Модричтің "Алтын доп" жүлдесін жеңіп алуға сеп болды.
2022. Карим Бензема (Франция)
Карим Бензема 2022 жылы мадридтік "Реал" клубының шабуылдағы көшбасшысы болды. Сол жылы франциялық ойыншы Ла Лига чемпионы, Испания және УЕФА Суперкубогын, сондай-ақ УЕФА Чемпиондар лигасын жеңіп алды.
2024. Родри (Испания)
Ал биылғы "Алтын доп" жүлдесін испаниялық жартылай қорғаушы Родри иеленді. Ол биыл Германияда өткен Еуропа чемпионатында жақсы өнер көрсетіп, турнирдің үздік ойыншысы атанған болатын. Сондай-ақ ол "Манчестер Сити" клубы сапында УЕФА Чемпиондар лигасының жартылай финалына дейін жеткен.
Мақаланың түпнұсқасы: https://kaz.nur.kz/sport/football/2179890-tek-messi-men-ronaldu-gana-emes-altyn-dop-zhuldesin-hhi-gasyrda-enshilegen-futbolshylar/
