Футболдан Қазақстан әйелдер құрамасының УЕФА Ұлттар лигасының алдағы маусымындағы қарсыластары анықталды. Бұл туралы KAZ.NUR.KZ Қазақстан футбол федерациясының ресми сайтына сілтеме жасап хабарлайды.
Ұлттық құрама күші жағынан үшінші және соңғы С лигасында ойнайды. Швейцарияның Сьон қаласында өткен жеребе қорытындысы бойынша Қазақстанмен бірге С3 тобына Швейцария, Люксембург, Армения және Лихтенштейн құрамалары кірді.
Командалар бір-бірімен өз алаңында және сырт алаңда бір матчтан өткізеді. С лигасының алты тобының жеңімпаздары жоғары дивизионға жолдама алады. Екінші орын алған екі үздік команда В лигасына шығу үшін плей-офф ойындарын өткізеді.
УЕФА Ұлттар лигасы 2025 жылдың ақпан айында басталады. Ойын кестесі кейінірек жарияланбақ.
Өткен маусымдағы УЕФА әйелдер Ұлттар лигасының чемпионы Испания құрамасы болған еді. Бұл команда финалда Францияны 2:0 есебімен ұтқан болатын. Жеңімпаздар сапынан Айтана Бонмати мен Мориона Кальдентей гол соққан еді.
Мақаланың түпнұсқасы: https://kaz.nur.kz/sport/football/2184744-futboldan-qazaqstan-quramasynyng-2025-zhylgy-ulttar-ligasyndagy-qarsylastary-anyqtaldy/
