Футболдан Қазақстан құрамасының бас бапкері міндетін уақытша Талғат Байсуфинов атқарады
Опубликовано:
Футболдан Қазақстан ұлттық құрамасының бас бапкері міндетін уақытша белгілі отандық маман Талғат Байсуфинов атқарады. Бұл туралы Қазақстан футбол федерациясына сілтеме жасаған KAZ.NUR.KZ хабарлайды.
ҚФФ-ның баспасөз қызметінің мәліметінше, Талғат Маруаұлы ұлттық құраманы 2026 жылғы әлем чемпионатының іріктеу кезеңі аясында өтетін Лихтенштейн (10 қазан) және Солтүстік Македониямен (13 қазан) болатын ойындарына дайындайды.
Байсуфинов бұған дейін ұлттық құраманы 2016-2017 және 2020-2022 жылдары екі мәрте басқарды. Ал қазіргі таңда Қазақстан жастар құрамасы (U21) бапкерлерінің менторы қызметін атқарады.
"ҚФФ Талғат Маруаұлының тәжірибесіне сенім артып, алдағы ойындарда сәттілік тілейді. Сонымен қатар ҚФФ ұлттық құраманың жаңа бас бапкері қызметіне үміткерлермен келіссөз жүргізіп жатыр. Тізімде үш шетелдік маман бар", - делінген хабарламада.
Естеріңізге сала кетейік, футболдан Қазақстан ұлттық құрамасының бұрынғы бас бапкері Әли Әлиев қызметінен кететінін мәлімдеген еді.
Ол мұндай мәлімдемені ұлттық құрама 2026 жылғы әлем чемпионатының іріктеу кезеңі аясындағы кездесуде Бельгиядан 0:6 есебімен ұтылып қалғаннан кейін жасаған болатын.
Мәтіннен қате тапсаңыз, бізге жазыңыз
Оригинал статьи: https://kaz.nur.kz/sport/football/2292090-talgat-baisufinov-futboldan-qazaqstan-quramasynyng-bas-bapkeri-mindetin-uaqytsha-atqaratyn-bolady/