"Алматыдағы матчтармен салыстырғанда бағасы арзан": "Қайрат" пен "Интер" матчына билеттер қанша тұратыны белгілі болды

Алматының "Қайрат" футбол клубының баспасөз қызметі команданың итальялық "Интер" командасымен сырт алаңда өтетін ойынына билеттер сатыла бастағанын хабарлады. Бағалары Алматыдағы матчтарға қарағанда арзан.

"Қайраттың" баспасөз қызметінің хабарлауынша, УЕФА Чемпиондар лигасы аясындағы "Интер" командасымен ойын 5 қарашада аты аңызға айналған Джузеппе Меацца стадионында өтеді. Сырт алаңдағы билеттер сатыла бастады, бірақ билеттер қайтарылмайды.

Өтінімді рәсімдеуге жіберген кезде жеке деректеріңізді, туған күніңізді, жынысыңызды, электрондық пошта мекенжайыңызды және байланыс телефоныңызды көрсетуіңіз керек. Электронды билеттер 4 қарашадан кешіктірілмей жіберіледі.

"Стадионға кіре берісте құжаттар тексеріледі, сондықтан ақпарат дәлме-дәл келуі керек. Матч басталар алдында сырт алаңда жанкүйерлерге жалаушалар таратылады", - деп ескертті "Қайрат" өкілдері.

Ал Sports.kz сайтының хабарлауынша, Милан стадионының қонақтар секторындағы билет құны 7 000 теңге.

"Салыстырар болсақ, "Қайраттың" Алматыдағы өз алаңындағы матчтарының билеті 30 000-250 000 теңге аралығында болды. Сондықтан Италияда билет бағасы айтарлықтай арзан. Айта кетейік, Чемпиондар лигасының өз алаңындағы матчтарының билет бағасын қабылдаушы команда басшылығы УЕФА-мен келісе отырып белгілейді.

"Биылғы маусымда "Қайраттың" өз алаңындағы матчтарына билеттер турнирдегі басқа командалармен салыстырғанда ең қымбат екені белгілі болды", - деп жазады басылым.

Мәтіннен қате тапсаңыз, бізге жазыңыз