"Барыс" хоккей клубы "Автомобилист" командасынан жеңіліп қалды

Құрлықтық хоккей лигасы аясындағы кезекті ойында астаналық "Барыс" клубы Ресейдің "Автомобилист" (Екатеринбург) командасына есе жіберді. Бұл туралы KAZ.NUR.KZ тілшісі хабарлайды.

Матчтың алғашқы шайбасын 15-минутта ресейлік клуб сапынан Степан Хрипунов салды. Ойынның 50-минутында "Барыс" хоккейшісі Портус Оберг есепті теңестірді. Кейін қарсылас командадан Кёртис Волк (52-минутта), Анатолий Голышев (56-минутта) мергендік танытты. Ал 57-минутта елордалық клуб сапынан Кристиан Хенкель көзге түсіп, қақпаға шайбаны дәл бағыттай алды. Бірақ ойын 2:3 есебімен аяқталып, "Автомобилист" клубының пайдасына шешілді.

Қазір "Барыс" командасы Шығыс конференциясының кестесінде 11-орында тұр. Ал "Автомобилист" 4-орында келеді.

Еске салайық, бұған дейін елордалық клуб Мәскеудің "ЦСКА" командасына есе жіберген еді (5:2).

Енді "Барыс" 24 қаңтарда Ресейде "СКА" (Санкт-Петербург) командасына қарсы ойнайды. Кейін 26 қаңтарда "Лада" (Тольятти) клубымен кездеседі.

Мәтіннен қате тапсаңыз, бізге жазыңыз