Хоккейден Қазақстан құрамасы әлем чемпионатының плей-офф кезеңіне өте алмады

Хоккейден Қазақстан жастар құрамасы (U20) 2025 жылғы әлем чемпионатының плей-офф кезеңіне өте алмады. Енді элиталық дивизиондағы орнын сақтап қалу үшін ойнайды, деп хабарлайды KAZ.NUR.KZ тілшісі.

"В" тобындағы соңғы ойында ұлттық құрама Швейцариямен кездесті. Ойын 1:3 есебімен қазақстандықтардың жеңілісімен аяқталды.

Жеңімпаздар сапында Саймон Майер (2 минут), Робин Нико Антенен (38 минут) және Людвиг Джонсон (49 минут) гол соқты. Қазақстан құрамасының жалғыз голын Кирилл Ляпунов 7 минутта салды.

Осы жеңістің арқасында Швейцария құрамасы 3 ұпай жинап, 4-орынмен әлем чемпионатының плей-офф кезеңіне өтті. "В" тобынан Чехия, Швеция және Словакия да ширек финалға шықты.

Қазақстандықтар 1 ұпаймен бесінші орынға көтеріліп, медальдар үшін күресті тоқтатты. Сергей Старыгин шәкірттері "А" тобында соңғы орын алған Германиямен элиталық дивизиондағы орнын сақтап қалу үшін ойнайды.

Мәтіннен қате тапсаңыз, бізге жазыңыз