Қазақстандық аралас жекпе-жек шебері Жалғас Жұмағұлов (16-9) Oktagon промоушеніндегі дебюттік жекпе-жегі қашан және қайда болатынын айтты. Бұл туралы KAZ.NUR.KZ хабарлайды.
Қазақстандық файтер Жалғас Жұмағұлов Oktagon промоушеніндегі алғашқы жекпе-жегіне дайындалып жатыр. Ол Instagram желісіндегі ресми парақшасында жекпе-жегінің болатын күні мен орнын жариялады.
"Күні белгілі, қарсылас бар, 9 қараша, Словакия", - деді ол Instagram желісіндегі Stories-ке жариялаған видеосында.
17 қыркүйекте қазақстандық аралас жекпе-жек шебері Жалғас Жұмағұлов өзінің мансабын Оktagon промоушенінде жалғастыратынын мәлімдеген болатын.
Осыған дейін ол UFC промоушенінде бақ сынаған. Қазақстандық файтер бұл промоушенде 7 кездесу өткізіп, 1 рет жеңіске жетсе, 6 мәрте жеңіліс тапты.
Айта кетейік, Жалғас Жұмағұлов соңғы жекпе-жегін биыл 24 ақпанда Алматыдағы Naiza FC 57 турнирінде өткізген болатын. Сол кездесуде ол америкалық спортшы Кливленд Маклинді төрешілердің бірыңғай шешімімен жеңіп шықты.
Мақаланың түпнұсқасы: https://kaz.nur.kz/sport/mma/2163766-zhalgas-zhumagulov-zhanga-promoushendegi-algashqy-zhekpe-zhegi-qashan-zhane-qaida-otetinin-aitty/
