Америкалық файтер Колби Ковингтон жартылай орта салмақтағы жекпе-жек шебері Шавкат Рахмоновпен UFC 310 турнирінде кездесуге дайын екенін айтты. Бұл туралы KAZ.NUR.KZ хабарлайды.
UFC файтері Колби Ковингтон аталмыш промоушен басшылығына Шавкат Рахмоновқа қарсы жекпе-жек өткізуге дайын екенін жеткізді. Бұл туралы ол YouTube желісіндегі Submission Radio арнасына берген сұқбатында айтты.
"Мен UFC басшылығына жекпе-жекке шығуға дайын екенімді айттым, Шавкат Рахмоновпен кездесуге қарсы емеспін. Бірақ UFC-дің басқа жоспарлары бар сияқты. Олар Усман мен Шавкат арасындағы жекпе-жекті ұйымдастыруға шешім қабылдағанға ұқсайды", - деді Колби Ковингтон.
Сондай-ақ 36 жастағы Колби Ковингтон қазақстандық файтер Шавкат Рахмоновпен октагонда кездессе, оны жеңетініне сенімді екенін айтты.
"Мен оны қыспаққа алып, басып тастай аламын. Оған менің жекпе-жек мәнерім ұнамайды. Ол солақайларға қарсы дұрыс төбелесе алмайды. Біз оның Джефф Нилмен өткізген жекпе-жегін көрдік – бұл өте тартысты кездесу болды. Ол әлі дивизиондағы топ үміткерлермен кездескен жоқ. Кейбір топ-10 шегіндегі жігіттермен жұдырықтасты, бірақ мен сияқты чемпиондармен жекпе-жекке шыққан жоқ. Мен оның әр бес раунд бойы қысымға шыдас бере алмайтынын білемін. Ол бойы ұзын, бірақ одан ерекше ештеңе байқап тұрған жоқпын. Оның бірнеше жақсы жекпе-жектері болды және ол өте "қолайсыз" қарсылас екенін жасырмаймын. Бірақ ол бұл артықшылығын тек күрескен кезде пайдалана алады. Ал менімен ол бұлай жасай алмайды. Мен оны оңай жеңемін", - деп пікір білдірді Колби Ковингтон.
Айта кетейік, америкалық файтер Колби Ковингтон кәсіби мансабында 21 кездесу өткізіп, 17 жеңіске жетсе, 4 рет жеңіліс тапқан. Соңғы рет ол былтыр 16 желтоқсанда Леон Эдвардстан төрешілердің бірыңғай шешімімен жеңілген болатын.
Қазіргі таңда ол UFC-дің жартылай орта салмақтағы рейтингінде 6-орынға жайғасқан.
Сондай-ақ жақында UFC-дің жартылай орта салмақтағы бұрынғы чемпионы Камару Усман жақын арада октагонға оралатынын мәлімдеген еді.
Мақаланың түпнұсқасы: https://kaz.nur.kz/sport/mma/2184258-tobelese-almaidy-shavkat-rahmonovty-amerikalyq-faiter-zhekpe-zhekke-shaqyrdy/
