![Фото Фото](https://cdn.nur.kz/images/1120x630/a6d7025517082fc3.jpeg)
Атырау облысының әкімі Махамбет Досмұхамбетов Токиода өткен Паралимпиада ойындарының жүлдегерлеріне пәтер мен көлік кілтін табыстады. Бұл туралы әкімдік Facebook парақшасында хабарлады.
"Бұл – қажырлы еңбек пен биік намыстың, өршіл руһтың жеңісі. Бұл- берік сенім мен мемлекетшілдіктің жарқын үлгісінің жемісі! Әрбір атыраулық параспортшы алтын медальге лайық өнер көрсетті. Сондықтан әрқайсыңыз біз үшін жеңімпазсыз!", - дейді Досмұхамбетов.
Айта кетейік, Токио Паралимпиадасына қатысқан 8 атыраулық спортшының үшеуі - Әнуар Сариев, Теміржан Дәулет және Зарина Байбатина ел қоржынына күміс жүлде салды.
Ал Аманжол Жанбота 5-орынды, Нұрлан Домбаев паратаеквондодан 5-орынды, Ержан Сәлімгереев паражүзуден 6-орынды иеленді.
Осы орайда, күміс жүлдегерлердің әрқайсысына екі бөлмелі пәтер мен көлік кілті табысталып отыр. Сондай-ақ, парадзюдодан Қазақстанның бас бапкері Жандос Қияновқа 4 миллион теңге, ал өзге жаттықтырушылар мен жарыс қатысушыларына 1 миллион теңгенің сертификаттары берілген.
![Фото Фото](https://cdn.nur.kz/images/1120/3c26629d0aeecc49.jpeg)
Парадзюдошы Әнуар Сариев жүлдесін ел Тәуелсіздігінің 30 жылдығына арнайтынын айтты.
"Бізге қолдау білдірген әрбіріңізге алғыс айтамын. 2024 жылғы Парижде өтетін паралимпиада ойындарында күміс медалімізді алтынға айналдыруға тырысамыз", - дейді ол.
![Фото Фото](https://cdn.nur.kz/images/1120/c80b1a3761fdbc3e.jpeg)
![Фото Фото](https://cdn.nur.kz/images/1120/143b05ed121726c0.jpeg)
Мақаланың түпнұсқасы: https://kaz.nur.kz/sport/other-sports/1931181-atyrau-oblysynda-paralimpiadasylgarga-pater-men-kolik-tabystaldy/