Абай облысында Қазақстан шахмат федерациясының филиалы ашылды. Оның төрағасы болып Семей қаласының әкімі Нұрбол Нұрсағатов тағайындалды, деп хабарлайды федерация ресми сайтында.
Шахмат федерациясының мәліметінше, 26 қыркүйекте Семейдің үздік әуесқой шахматшылары арасында турнир өтті. Турнир"Шахмат керуені" республикалық жобасының аясында ұйымдастырылған.
Жоба өңірлерде аталған спорт түрін дамыту мақсатында қолға алынған. Семейге дейін "Шахмат керуені" жобасы Көкшетау, Петропавл, Қостанай, Қарағанды, Павлодар қалаларында болған.
"Бұл – тәуелсіз Қазақстан тарихында бұрын-соңды болмаған оқиға. Біз алғашқылардың бірі болып Ұлы Жібек жолын жалғастырдық. 14 мың шақырымдай сапар шегіп, әр облыс орталығын аралаймыз. Шахматтан жеткен жетістіктеріміз халықаралық аренада үлкен танымалдылыққа ие боп келе жатыр. Енді аймақтардың қолдауын сезінгіміз келеді.
Ұлттың зияткерлік әлеуетін дамыту үдерісіне тек шахматшылар ғана емес, барша жұртшылық, кәсіпкерлер мен жергілікті атқарушы билік өкілдері атсалысса екен дейміз. Шахмат қарапайым спорт түрі ғана емес. Мысалы, оны мектепте оқыту арқылы біз балаларымыздың дамуына қосымша серпін береміз", - дейді Қазақстан шахмат федерациясының вице-президенті Александр Бабенко.
Мақаланың түпнұсқасы: https://kaz.nur.kz/sport/other-sports/2038285-semei-qalasynyn-akimi-qazaqstan-saxmat-federaciyasy-filialynyn-bassysy-boldy/
