Данияр Қобыландин бүкіләлемдік көкпар қауымдастығының президенті болып сайланды. Бұл туралы ұйымның баспасөз қызметі хабарлады, деп жазады KAZ.NUR.KZ.
Дүниежүзілік көкпар қауымдастығына Данияр Қобыландин басшы болды. Мұндай шешімді бірлестік мүшелері кезекті конференцияда ашық дауыс беру арқылы қабылдады.
"Үлкен сенім үшін баршаңызға алғыс білдіргім келеді. Мен қауымдастықтың қызметін жоғары деңгейге көтеру үшін барлық күшімді салып, мүмкіндіктерді пайдаланамын. 2024 жылы Қазақстанның астанасы Астана қаласында Дүниежүзілік Көшпенділер ойыны өтеді. Яғни, мойнымызда үлкен жауапкершілік тұр. Сондай-ақ, алдымызда ұлттық және дәстүрлі ат спорты ойындарын одан әрі дамыту бойынша үлкен міндеттер бар. Иә, түрлі елдерде ойынның атауы әртүрлі, бірақ ойын ережесі бірдей", - деді Қобыландин.
Сондай-ақ, форумда Венгрияның көкпар қауымдастығын (кобори) және Пәкістанның бузкаши федерациясын Дүниежүзілік көкпар қауымдастығының құрамына қосу туралы шешім қабылданды.
Данияр Жаңабайұлы 1984 жылы дүниеге келген. Оның дене шынықтыру және спорт саласындағы тәжірибелі мамандардың бірі. 2018-2022 жылдар аралығында "Аударыспақ" федерациясының президенті қызметін атқарған.
Айта кетейік, аталған жиынның екінші кезеңін 28 қазанда Алматыда өткізу жоспарланып отыр. Онда ұлттық және дәстүрлі ат спорты ойындарын одан әрі дамыту жөніндегі шұғыл міндеттер және Дүниежүзілік көкпар қауымдастығының Жарғысына өзгерістер мен толықтырулар енгізу мәселелері қаралады.
Мақаланың түпнұсқасы: https://kaz.nur.kz/sport/other-sports/2038652-moinymyzda-ulken-zauapkersilik-tur-bukilalemdik-kokpar-federaciyasyna-zana-bassy-keldi/
