Футболдан Қазақстан құрамасының бас бапкері Магомед Адиев өзінің Instagram парақшасында ҚФФ президенті Әділет Барменқұлов көлік кілтін тапсырғанын айтты, деп жазады KAZ.NUR.KZ тілшісі.
Ресейлік маман жаңа көлікті ұлттық құраманың Еуро-2024 іріктеу кезеңінде көрсеткен өнері үшін сыйақы ретінде алған. Қазақстан құрамасы турнирге тікелей жолдама алмаса да, 18 ұпай жинап, тарихтағы ең үздік нәтиже көрсетті.
"Жомарт сыйлық үшін барша Қазақстанға шексіз алғысымды білдіремін. Мен мұны ішінара лайықсыз деп санаймын, өйткені, менің ойымша, бапкер ретінде де, команда ретінде де жанкүйерлер алдында қалаған нәтижеге жете алмадық. Мен және әріптестерім алға қойған мақсатымызға жету және футболдан Еуропа чемпионатына қатысу үшін қолдан келгеннің бәрін жасаймыз.
Біз алдымызда көп жұмыс күтіп тұрғанын мойындаймыз және барлық күш-жігерімізді салып, спортқа деген құштарлық пен адалдықты футбол алаңында жеткіземіз. Мен бұл сыйлықты өте жоғары бағалаймын және бұл мен үшін мотивация ғана емес, сонымен бірге біздің еліміз бен оның халқы алдындағы жауапкершілігімізді еске салады. Бізге сеніп, қолдау көрсеткендеріңіз үшін барлығыңызға рақмет", - деді Адиев.
Мақаланың түпнұсқасы: https://kaz.nur.kz/sport/other-sports/2047611-magomed-adiev-qazaqstan-futbol-federaciyasynan-bagaly-syilyq-aldy-foto/
