Олимпиада чемпионы Қазақстан футболының мұражайына құнды жәдігерлерді сыйға тартты

1988 жылғы Олимпиада чемпионы Евгений Яровенко Қазақстан футбол мұражайына құнды жәдігерлерді тапсырды. Бұл туралы KAZ.NUR.KZ Қазақстан футбол федерациясының ресми сайтына сілтеме жасап хабарлайды.

Футбол мұражайының коллекциясын КСРО құрамасының 1988 жылғы үлгідегі ойын жейдесі, Олимпиада ойындарына қатысушының медалі және Оңтүстік Кореядағы ойындардан естелік фотосуреттер толықтырды.

Евгений Викторович мұражайға эксклюзивті экспонаттарды тапсырып, аталмыш жәдігерлердің маңыздылығын айтып берді.

"Бұл 37 жыл бұрынғы жейде. Оны біздің жас ұрпақ тарихты білуі үшін музейге тапсыруды жөн көрдім. Сонымен қоса, 1988 жылы 1 қазанда Сеулде бразилиялықтарға қарсы өткен финалдың суреттері де табысталды.

Мұражай жыл сайын жаңа жәдігерлермен толығып отыруы керек. "Қайрат" пен ұлттық құрама жұлдыздарының да мұражайға берері көп деп ойлаймын", – деді Олимпиада чемпионы.

Еске салайық, Қазақстан футбол мұражайы 2023 жылы қазақ футболының 110 жылдығына орай ашылды.

Мәтіннен қате тапсаңыз, бізге жазыңыз