Қазақстанның Ұлттық Олимпиада комитеті басқару органдарын сайлау процесі қалай жүзеге асатынын түсіндірді. Бұл туралы KAZ.NUR.KZ Ұлттық Олимпиада комитетінің ресми сайтына сілтеме жасап хабарлайды.
"Қазақстан Республикасының Ұлттық Олимпиада комитеті түрлі "cарапшылар" тарапынан орын алып отырған ақпараттың ықтимал бұрмалануына ерекше алаңдаушылық білдіреді және жалпы қауымның көзқарастарының бұрмалануын, жалған ақпараттың таралуын және негізсіз баға беруді болдырмау үшін пікір білдіруде нақтылықты сақтауға шақырады", – делінген Ұлттық Олимпиада комитетінің ресми сайтындағы ақпаратта.
Сондай-ақ мәлімдемеде комитеттің басқару органдарын қалыптастыру тәртібі егжей-тегжейлі жазылған.
"Қазақстан Республикасы Ұлттық Олимпиадалық комитетінің (ҚР ҰОК) басқару жүйесі барлық басқару органдарын сайлаудың демократиялық қағидаттарына және Жарғысына қатаң сәйкес шешімдер қабылдаудың алқалылығына негізделген. Көп жағдайда шешімдер консенсус арқылы қабылданады, бұл ашық және тиімді шешім қабылдаудың ең жақсы түрі болып саналады. Барлық процесс және қабылданған шешімдер өз кезегінде Халықаралық Олимпиада Комитетімен (ХОК) олардың Олимпиада хартиясының және ХОК Әдеп кодексінің ережелеріне сәйкестігін қамтамасыз ету мақсатында келісуге тиіс.
ҚР ҰОК басқару органдары немесе лауазымды тұлғалары басшылықтың жеке шешімі бойынша тағайындалмайды", – деп түсіндірді Ұлттық Олимпиада комитеті.
Бұған қоса ҚР ҰОК басқару органдары Бас Ассамблея, Атқару комитеті, Тексеру комиссиясы, спортшылар комиссиясы және тұрақты түрде жұмыс істейтін ҰОК комиссиялары екені атап өтілді.
"ҚР ҰОК басқару органдарын және оның лауазымды тұлғаларын ҚР ҰОК мүшелері – олимпиадалық спорт түрлері бойынша ұлттық спорт федерациялары алқалы түрде сайлайды. Барлық басқару органдарының өкілеттік мерзімі 4 жылды құрайды. Басқару органдарының барлық мүшелері мен лауазымды тұлғалар өз қызметін қоғамдық негізде жүзеге асырады, бұл қызмет үшін жалақы көзделмейді. Сайлау тәуелсіз Сайлау комиссиясының басқаруымен жасырын дауыс беру арқылы өтеді, оны ҚР ҰОК мүшелері де сайлайды. Басқару органдарының құрамына немесе лауазымды тұлғаға сайлау үшін барлық кандидатураларды тек ҚР ҰОК мүшелері мәлімдейді.
Олимпиадалық Хартия ережелерін және ХОК Әдеп кодексін сақтау мақсатында ҚР ҰОК сайлау процесі басталған сәттен бастап ХОК-қа іске асырылып отырған іс-шаралар туралы хабарлайды. Сайлау процесі аяқталғаннан кейін ХОК-қа сайлау қорытындылары мен орындалған іс-шаралар туралы есеп жіберіледі", — делінген комитеттің ақпаратында.
Сонымен қатар ҚР ҰОК басқару органдарын сайлау процесі құрылымдалған көп деңгейлі рәсім екені айтылды.
"Бірінші кезең олимпиадалық спорт түрлері бойынша ұлттық федерациялардағы сайлауды қамтиды, онда әр спорт түрінің спорт қауымдастығының өкілдері өздерінің ұлттық федерациясының басшылығы мен басқару органдарын сайлайды. Осыдан кейін ұлттық федерациялар ҰОК басқару органдарын сайлауға қатысады. Бұл тәсіл бүкіл сайлау процесінің тұрақтылығы мен ашықтығын қамтамасыз ете отырып, біржақты шешім қабылдауды болдырмайды. Сайлауға көп деңгейлі көзқарастың мұндай жүйесі олимпиадалық спорт түрлері бойынша халықаралық спорт ұйымдары мен федерацияларда жүзеге асырылады. Сайлау процесінің дербестігі мен ашықтығы Халықаралық Олимпиада комитетінің тұрақты бақылауында", – делінген мәлімдемеде.
Мақаланың түпнұсқасы: https://kaz.nur.kz/sport/other-sports/2059313-zalgan-aqparattyn-taraluyn-boldyrmaimyz-uok-basqaru-organdaryn-qalyptastyru-tartibin-zariyalady/
