"Қайрат" футзал клубының қамқоршылық кеңесінің төрағасы қайтыс болды

Алматылық "Қайрат" футзал клубының қамқоршылық кеңесінің төрағасы Игорь Мажинов қайтыс болды. Бұл туралы KAZ.NUR.KZ "Қайрат" командасының Instagram-дағы ресми парақшасына сілтеме жасап хабарлайды.

Игорь Мажинов 52 жасқа қараған шағында өмірден өтті.

"Оның "Қайрат" футзал клубы үшін маңызын бағаламау қиын. Игорь Мажинов әрқашан клуб пен футзалдың дамуына үлкен үлес қосқан біздің команданың жанкүйері болды. Ол өзінің кәсібилігімен, өмірге деген құштарлығымен және қажымас ынтасымен әріптестерін ғана емес, көптеген спортшыларды да шабыттандырды.

Футзал әлеміндегі ықпалынан басқа, Игорь Мажинов іскерлік және спорттық қоғамдастықта құрметті адам болды. Бұрынғы кәсіби спортшы, биатлоншы ол әрқашан өзінің игі істерімен және кеңестерімен көпшілікті шабыттандырды және қолдады. Оның қазасы клубпен байланысты адамдар үшін өте ауыр.

Игорь Мажинов туралы жарқын естелік пен оның мұрасы бізбен мәңгі бірге болсын. Біз оның отбасына, барлық жақын адамына шын жүректен көңіл айтамыз", – делінген "Қайрат" футзал клубының Instagram желісіндегі жазбасында.

Мәтіннен қате тапсаңыз, бізге жазыңыз