Қазақстан Ұлттық Банкі "Спорт" сериясынан UEFA EURO 2024 коллекциялық монеталарын айналымға шығармақ. Бұл туралы KAZ.NUR.KZ Ұлттық банктің ресми сайтына сілтеме жасап хабарлайды.
Аталған коллекциялық монеталар MDM неміс нумизматикалық компаниясымен әріптестік негізде дайындалды. Монеталардың сатуға шығарылатын күніне қатысты ақпарат ҚҰБ ресми сайтында қосымша хабарланады.
"Монетадағы футбол добы жер шарын бейнелейді. Допта чемпионат матчтары өтетін қалалар белгіленген Германия картасының контуры бейнеленген. Доптың сыртында турнирдің финалдық бөлігіндегі командалардың санын білдіретін 24 жұлдыз бар", – делінген Ұлттық банктің ресми сайтындағы ақпаратта.
Монеталар күмістен дайындалған, сынамасы – 925/1000. Монета массасы – 20 грамм, диаметрі – 32 мм, дайындау сапасы – proof және anti-proof. Монетаның номиналы – 100 теңге, жалпы таралымы – 2 500 дана. Қазақстанның ішкі нарығы үшін монета таралымы – 1 500 дана, сыртқы нарық үшін (жоба серіктесі – MDM нумизматикалық компаниясы) – 1 000 дана.
Монеталар Қазақстан Республикасының бүкіл аумағында өзінің номиналды құнына сай төлемнің барлық түрі бойынша қабылдануға, барлық банкте банк шоттарына есепке алынуға және аударылуға, ұсақталуға және айырбасталуға жатады. Монеталар Қазақстан теңге сарайында дайындалды. Мемлекеттік, орыс және ағылшын тілдерінде ҚҰБ нөмірленген сапа сертификаты бар кәдесый қаптамасында шығарылады.
Айта кетейік, футболдан Еуропа чемпионаты 14 маусым мен 14 шілде аралығында Германияда өтеді. Қазақстан құрамасы бұл турнирге өте алмады.
Мақаланың түпнұсқасы: https://kaz.nur.kz/sport/other-sports/2075025-ulttyq-bank-futboldan-euro-2024-turnirine-arnalgan-kollekciyalyq-monetalardy-ainalymga-sygarady/
