Қазақстан құрамасының Париж Олимпиадасына арналған киімі таныстырылды (фото)

Қазақстан құрамасының Парижде өтетін жазғы Олимпиада ойындарына арналған киім үлгілері таныстырылды. Бұл туралы KAZ.NUR.KZ тілшісі хабарлайды.

Бүгін, 18 сәуірде мәжілістің әлеуметтік-мәдени даму комитетінің отырысында мәжіліс депутаттарына Қазақстан спортшыларының Париж Олимпиадасына арналған киім үлгілері таныстырылды.

Киім үлгілері бірнеше формадан тұрады. Олимпиадаға ту ұстап шығатын боксшы Асланбек Шымбергенов пен жеңіл атлетші Надежда Дубовицкаяға бөлек форма қарастырылған.

Сондай-ақ спортшылар cалтанатты шеруге шыққанда киетін киім де таныстырылды.

Бұдан бөлек марапаттау рәсіміне арналған бөлек киім беріледі. Сонымен бірге жаттығу жасағанда киетін форма жинағы да қарастырылған.

Айта кетейік, биыл жазғы Олимпиада ойындары 26 шілде мен 11 тамыз аралығында Парижде (Франция) өтеді. Қазір Қазақстан құрамасында 13 спорт түрінен Олимпиаданың 33 лицензиясы бар: бокс – 7 (ерлер 6, әйелдер 1); нысана көздеу – 5; садақ ату – 4; семсерлесу – 4; тас жолдағы велоспорт – 3; қазіргі бессайыс – 2; таэквондо – 2; грек-рим күресі – 1; еркін күрес – 1; спорттық гимнастика – 1; батуттағы гимнастика – 1; жеңіл атлетика –1; бадминтон – 1.