Бүгін, 24 мамырда Лозаннада Қазақстан Ұлттық Олимпиада комитетінің Халықаралық Олимпиада комитетіне ресми іс-сапары аяқталды. Бұл туралы KAZ.NUR.KZ ҰОК-нің ресми сайтына сілтеме жасап хабарлайды.
Олимпиада үйіндегі екі күндік тығыз бағдарламаның басты оқиғасы – Қазақстан ҰОК президенті Геннадий Головкиннің ХОК басшысы Томас Бахпен кездесуі болды.
Бах мырза әңгіме аясында ҰОК президенті Геннадий Головкинді жауапты қызметке сайлануымен құттықтап, Қазақстан Ұлттық Олимпиада комитетінің жаңа басшылығына ХОК тарапынан қолдау көрсететінін жеткізді.
ҰОК басшысы жаңарған команданың басты басымдықтарына назар аударып, халықаралық әріптестік пен атлеттерді қолдау бағдарламаларына ерекше тоқталып өтті. Геннадий Геннадьевич ҰОК-тің Халықаралық Олимпиада комитетіне сенімді серіктес болып қалатынын және ұйымның барлық бастамаларын, оның ішінде, спортшылар құқығын қорғауға арналған ұсыныстарды әрдайым қолдайтынын айтты.
Тараптар олимпиадалық күн тәртібіндегі маңызды мәселелерді және Олимпиадалық қозғалысты дамыту жұмыстарын, оның ішінде, қозғалысты Орталық Азия аймағында ілгерілету туралы сауалдарды талқылады.
Кездесуден соң ХОК басшысы Геннадий Головкинді ұйымның штаб-пәтеріне келген әйгілі атлеттер қолтаңба қалдыратын олимпиадашылар қабырғасына қол қоюға шақырды.
"Халықаралық Олимпиада комитеті мен арнайы Томас Бах мырзаға бізге шақырту жіберіп, жылы қарсы алғаны үшін барша командамыздың атынан алғыс айтамын. Бұл кездесу ортақ мақсат жолында біріккен екі ұйым арасындағы берік әрі сенімді әріптестіктің бастауы боларына күмәнім жоқ", - деп атап өтті Геннадий Головкин.
Айта кетелік, кездесу ХОК директоры Джеймс Маклодтың, ХОК-тің ҰОК-термен қарым-қатынас жөніндегі директорының орынбасары Ольвие Ниамканың және Қазақстан ҰОК бас хатшысы Жанар Утешеваның қатысуымен өтті. Екі ұйым басшысы келесі кездесуді 2024 жылғы Париж Олимпиадасында өткіземіз деп келісті.
Мақаланың түпнұсқасы: https://kaz.nur.kz/sport/other-sports/2106402-gennadii-golovkin-halyqaralyq-olimpiada-komitetining-basshysymen-kezdesti-foto/
