Қазақстанның бірінші, әлемнің төртінші ракеткасы Елена Рыбакина "Ролан Гаррос" турнирінің ширек финалына өтті. Бұл туралы KAZ.NUR.KZ тілшісі хабарлайды.
Рыбакина жарыстың төртінші айналымында украиналық Элина Свитолинаға қарсы ойнады. Бұл бәсекеде қазақстандық теннисші 6:4, 6:3 есебімен басым түсті.
Рыбакина мен Свитолина осыған дейін үш рет кездескен. Соңғы кездесу Токио Олимпиадасында болды. Ол кезде екі теннисші қола жүлдеге таласып, украиналық спортшы жеңіске жеткен еді.
Еленаның "Роллан Гаррос" турниріндегі келесі қарсыласы әлемнің 15-ракеткасы италиялық Ясмине Паолини мен рейтингте 70-орында тұрған ресейлік Элина Аванесян арасындағы ойыннан кейін анықталады.
Еске салайық, Елена Рыбакина "Ролан Гаррос" жарысының алғашқы айналымынан кейін болған баспасөз мәслихатында журналистердің бірсарынды сұрақтарына шамданғанын жазған едік.
Мақаланың түпнұсқасы: https://kaz.nur.kz/sport/other-sports/2111436-elena-rybakina-ukrainalyq-tennisshini-zhengip-tokio-olimpiadasynda-ketken-esesin-qaitardy/
