Қазақстандық мәнерлеп сырғанаушы Денис Тенді жаттықтырған америкалық бапкер Фрэнк Кэрролл 85 жасында қайтыс болды. Бұл туралы KAZ.NUR.KZ АҚШ мәнерлеп сырғанау федерациясына сілтеме жасап хабарлайды.
Кэрролл Олимпиада және әлем чемпионы Эван Лайсачекті, бес дүркін әлем чемпионы Мишель Кванды және екі дүркін әлем чемпионы Линда Фратианиді жаттықтырды. Одан қазақстандық мәнерлеп сырғанаушы Денис Тен де тәлім алды.
Америкалық бапкер 1997 жылы АҚШ Ұлттық Олимпиада комитетінің "жылдың үздік жаттықтырушысы" сыйлығын жеңіп алған. Сондай-ақ ол 2007 жылы әлемдік мәнерлеп сырғанау спортының Даңқ залына енгізілді. Маман 2018 жылы бапкерлік мансабын аяқтаған болатын.
Еске салайық, қазақстандық мәнерлеп сырғанушы, Сочи Олимпиадасының қола жүлдегері Денис Тен 2018 жылы Алматыда автокөлік ұрыларының қолынан қаза тапты.
Мақаланың түпнұсқасы: https://kaz.nur.kz/sport/other-sports/2115018-denis-tendi-zhattyqtyrgan-aigili-bapker-omirden-otti/
