Туризм және спорт вице-министрі Серік Жарасбаев Париж Олимпиадасына дайындыққа мемлекеттік бюджеттен қанша ақша бөлінгенін айтты. Бұл туралы KAZ.NUR.KZ Орталық коммуникациялар қызметіне сілтеме жасап хабарлайды.
Баспасөз мәслихатында Серік Жарасбаев спортшылардың Олимпиадалық формасын тігуге және Олимпиадаға дайындыққа қанша қаражат кеткені туралы сұраққа жауап берді.
"Ұлттық құрама спортшылары мен делегация мүшелеріне арналған формалар тігілді және толықтай дайын. Бірақ олардың бағасын айта алмаймын. Өйткені формалар демеушілердің қаражаты есебінен тігілді. Сондықтан демеушілер қаражат жағын коммерциялық құпия ретінде сақтауды өтінді.
Ал Олимпиада ойындарына кеткен толық шығынға келер болсақ, ол мемлекеттік бюджет есебінен болғандықтан, жасырмаймыз. Ұлттық құраманы Олимпиадаға Спортты дамыту дирекциясы дайындайды. Жыл басынан бері ұлттық құраманы Олимпиада ойындарына дайындау мен қатыстыру мақсатында 980 миллион теңге бөлінді", - деді Жарасбаев.
Айта кетейік, Париж Олимпиадасы 26 шілде мен 11 тамыз аралығында өтеді. Додаға әлемнің түкпір-түкпірінен жиналған 10 мыңнан аса спортшы қатысады. Олар спорттың 32 түрінен 300-ден аса медальды сарапқа салады.
Мақаланың түпнұсқасы: https://kaz.nur.kz/sport/other-sports/2125821-parizh-olimpiadasyna-daiyndyqqa-biudzhetten-qansha-aqsha-bolindi/
