Жамбыл облысының әкімі Ербол Қарашөкеев дзюдодан Париж Олимпиадасының чемпионы Елдос Сметовтің шаңырағына барды. Бұл туралы KAZ.NUR.KZ тілшісі хабарлайды.
Жамбыл облысы әкімдігінің хабарлауынша, Ербол Қарашөкеев дзюдошы Елдос Сметовтің ата-анасы Бақтыбай және Тоқтагүл Сметовтерге "Облысқа сіңірген еңбегі үшін" белгісін, ал чемпионның жарына "Құрмет" грамотасын табыстаған.
"Елдос – ел сенімін ақтап, барша қазақстандықтардың, жанкүйерлерінің мерейін асырды. Әулиеата жұртының абыройын асқақтатты. Даңқты спортшы, Мәскеу Олимпиадасының жеңімпазы Жақсылық Үшкемпіров ағамыздың аңсаған арманын орындап, жеңісін 44 жылдан кейін қайталады.
"Алып анадан туады" деген қазақта аталы сөз бар. Елдостың елдің баласы атанып, байрақты бәсекелерде топ жаруына ата-анасының сіңірген еңбегі, тәлім-тәрбиесі, жанұясының қолдауы зор", - деді облыс әкімі.
Еске салайық, Елдос Сметов Париж Олимпиадасында Қазақстан қоржынына алғашқы алтынды салған еді. Ол финалда франциялық дзюдошы Лука Мхеидзені жеңді. Осылайша, дзюдодан Қазақстан тарихындағы тұңғыш Олимпиада чемпионы атанды.
Мақаланың түпнұсқасы: https://kaz.nur.kz/sport/other-sports/2141388-zhambyl-oblysynyng-akimi-eldos-smetovting-ata-anasy-men-zhubaiyna-qurmet-korsetti-video/
