Қазақстандық жеңіл атлет Жанна Мамажанова Франция астанасы Париждегі 2024 жылғы жазғы Олимпиаданың финалында бақ сынады. Бұл туралы KAZ.NUR.KZ тілшісі хабарлайды.
Жанна Мамажанова әйелдер арасындағы марафонға қатысты. Жарысты 91 спортшы бастаған еді. Бірақ оның тоғызы мәреге жете алмады. Ал қазақстандық жеңіл атлет 42 км 195 м қашықтықты 2 сағат 30 минут 51 секундта жүгіріп өтіп, 33-орынға тұрақтады.
Айта кетейік, Жанна Мамажанова Токио-2020 Олимпиадасына да қатысқан еді. Ол белгіленген межені 2 сағат 37 минут және 42 секундта бағындырып, 46-орын алған болатын.
30 жастағы марафоншы биыл сәуірде Роттердамда (Нидерланд) өткен жарыста Париж Олимпиадасының жолдамасын жеңіп алды. Ол жарыс жолын 2 сағат 26 минут 42 секундта еңсеріп, Қазақстан рекордын тіркеді. Бұл марафонға 17 мыңнан астам адам қатысқан болатын.
Мақаланың түпнұсқасы: https://kaz.nur.kz/sport/other-sports/2147415-parizh-olimpiadasy-qazaqstandyq-marafonshy-finalda-33-oryn-aldy/
