Қазақстандық спортшылар армрестлингтен әлем чемпионатында 82 алтын медаль жеңіп алды

Молдованың Кишинев қаласында армрестлингтен әлем чемпионаты өтті. Бұл додада қазақстандық спортшылар 82 алтын медаль жеңіп алды, деп KAZ.NUR.KZ тілшісі ҚР Туризм және спорт министрлігіне сілтеме жасап хабарлайды.

Маңызды тұстар

Бұл мәтін автоматты түрде ЖИ көмегімен жазылған және редактор тексермеген, сондықтан фактологиялық және грамматикалық қателер болуы мүмкін. Толығырақ жарияланымда.

• Молдованың Кишинев қаласында өткен армрестлингтен әлем чемпионатында қазақстандық спортшылар 82 алтын, 92 күміс, 82 қола медаль жеңіп алды.
• Жалпы командалық есепте Қазақстан бірінші орын алды, екінші орынға Түркия, үшінші орынға Грузия тұрақтады.
• Нұрдәулет Айдархан, Мейрамбек Ерсайын және Ердәулет Нұрмахан сияқты спортшылар бірнеше дүркін әлем чемпионы атағына ие болды.

15-25 тамыз аралығында Молдовада өткен әлем чемпионаты биыл 45-мәрте өтті. Биылғы додаға 61 мемлекеттен 1500-ге жуық қол күрес шебері сынға түсті. Бұл қатарда жасөспірімдер, жастар, ересектер, ардагерлер және пара атлеттер бар.

Әлем біріншілігінде ел намысын 150 спортшы қорғады. Қазақстандық спортшылар 82 алтын, 92 күміс, 82 қола жүлде (барлығы 256) еншілеп, жалпы командалық есепте 1-орын алды. Екінші орынға Түркия, үшінші орынға Грузия тұрақтады.

Нұрдәулет Айдархан Кишиневте ересектер арасында 7 дүркін (оң қолда алтын, сол қолда күміс), жастар арасындағы нәтижесін қосқанда 12 дүркін әлем чемпионы атанды. Сонымен бірге Молдовада Мейрамбек Ерсайын 7 дүркін, Ердәулет Нұрмахан 5 дүркін әлем чемпионы атағына ие болды.

Айта кетейік, былтыр армрестлингтен әлем біріншілігі Алматыда өткен еді. 52 елден 1000-нан астам спортшы қатысып, өзара мықтыны анықтаған болатын. Былтырғы чемпионатта Қазақстан құрамасы 72 алтын, 57 күміс, 27 қола медаль еншілеп, жалпы есепте топ жарған.

Сондай-ақ 2022 жылы Түркияның Анталья қаласындағы әлем чемпионатында 54 елден 1700 спортшы бас қосқан. Қазақстан 68 алтын, 66 күміс пен 36 қола жүлдемен жалпы есепте 1-орын алған.