Қазақстандық пара жүзгіш Әмір Мұратбеков Франция астанасы Париждегі жазғы Паралимпиада ойындарында 100 метрге брасс әдісімен жүзу жарысының финалында бақ сынады. Бұл туралы KAZ.NUR.KZ тілшісі хабарлайды.
SB11 санатында сынға түскен қазақстандық жүзгіш белгіленген қашықтықты 1:21:61 секундта жүзіп өтіп, мәреге жетінші болып келген еді. Бірақ ол дисквалификацияға ұшырап, нәтижесі есепке алынбады.
Алтын медальді Нидерланд өкілі Дорсман Рогиер жеңіп алса, күмісті қытайлық Ян Бозун, қоланы украиналық Данило Чуфаров қанжығалады.
Айта кетейік, Әмір Мұратбеков іріктеу сайысында 1:21:66 секунд нәтижесін тіркеп, финалға жолдама алған еді.
Бүгін, 6 қыркүйекте тағы бір қазақстандық пара жүзгіш Нұрдәулет Жұмағали Паралимпиада финалында бақ сынайды.
Әзірге Қазақстан құрамасының еншісінде 3 жүлде бар. Пара пауэрлифтингтен Давид Дегтярев алғашқы алтынды қоржынға салса, пара оқ атудан Еркін Ғаббасов күміс, пара жеңіл атлетикадан Дастан Мұқашбеков қола жүлде жеңіп алған болатын.
Мақаланың түпнұсқасы: https://kaz.nur.kz/sport/other-sports/2157879-paralimpiada-2024-amir-muratbekov-finalda-marege-zhetinshi-bolyp-zhetti/
