Қырғызстандық көкпаршылар Түркия командасын ойсырата жеңіп, финалға шықты

Көкпардан Қырғызстан ұлттық құрамасы Астанада өтіп жатқан V Дүниежүзілік көшпенділер ойындарында Түркия командасын жеңіп, финалға өтті. Бұл туралы KAZ.NUR.KZ тілшісі хабарлайды.

Қырғыз көкпаршылары екі кезеңде де басымдық танытып, 15:1 есебімен жеңіске жетті.

Осыған дейін Қазақстан құрамасы АҚШ командасынан 12:4 есебімен басым түскен еді.

V Дүниежүзілік көшпенділер ойындарындағы көкпар жарысына 9 мемлекеттен 104 спортшы тіркелген еді. Оның ішінде Қазақстан, Өзбекстан, АҚШ, Ресей, Қырғызстан, Мажарстан, Қытай, Моңғолия және Түркия мемлекетінің құрамалары бар.

13 қыркүйекке дейін жалғасатын V Дүниежүзілік көшпенділер ойындарына әлемнің 89 елінен 2430 спортшы қатысып жатыр. Байрақты бәсекеде 21 спорт түрі бойынша 97 медаль жиынтығы сарапқа салынады.

Қазір Қазақстан 14 алтын, 3 күміс, 8 қола жүлдемен медаль кестесінде көш бастап тұр. Екінші орынға Қырғызстан (3-7-4), үшінші орынға Ресей (3-2-5) жайғасқан.

Мәтіннен қате тапсаңыз, бізге жазыңыз