Бүгін, 11 қыркүйекте көкпардан Қазақстан құрамасы V Дүниежүзілік көшпенділер ойындарында Ресей командасын жеңіп, финалға өтті. Бұл туралы KAZ.NUR.KZ тілшісі хабарлайды.
Елордадағы "Қазанат" ипподромында өткен бәсекеде қазақ көкпаршылары 18:2 есебімен басым түсті.
Енді Қазақстан құрамасы ертең, 12 қыркүйекте финалда Қырғызстан командасымен кездеседі. Бұл ойын сағат 11:30-да басталады. Тікелей эфирді Qazaqstan телеарнасынан көруге болады.
Қырғыз көкпаршылары ширек финалда Түркия құрамасын 15:1 есебімен жеңіп, бірден финалға жолдама алған еді. Түркия командасы ертең Ресей спортшыларымен қола жүлдеге таласады.
Көшпенділер ойындарының медаль кестесінде Қазақстан 21 алтын, 10 күміс, 17 қола жүлдемен көш бастап тұр. Екінші орында Қырғызстан (7-9-7), үшінші орында Өзбекстан (7-8-9) келе жатыр.
Айта кетейік, V Дүниежүзілік көшпенділер ойындары 13 қыркүйекке дейін жалғасады. Дүбірлі додаға әлемнің 89 елінен 2430 спортшы қатысып жатыр. Байрақты бәсекеде 21 спорт түрі бойынша 97 медаль жиынтығы сарапқа салынады.
Мақаланың түпнұсқасы: https://kaz.nur.kz/sport/other-sports/2160033-qazaq-pen-qyrgyz-kokparshylary-koshpendiler-oiyndarynyng-finalynda-kezdesedi/
