Он дүркін Азия чемпионы атанған 83 жастағы шымкенттік қария қалай жаттығатынын айтты

83 жастағы шымкенттік қария Тәліпбек Әлжанов күш сайыстырудан Азияның 10 дүркін чемпионы атанып, әлемдік бәсекенің алтын және күміс медалін еншілеген. Бұл туралы KAZ.NUR.KZ Qazaqstan телеарнасының сайтына сілтеме жасап хабарлайды.

Тәліпбек Әлжанов аптасына 4 күн арнайы залға барып жаттығады. Ол қимыл қозғалысындағы жылдамдықты жоғалтып алмау үшін алдымен бокс қабымен жұдырықтасады. Кейін күш-қайратты арттыратын түрлі жаттығуларға кіріседі.

"Ауыр заттарды тонналап көтереміз. Гантель бар. 10-нан 18 килограмға дейін барам. Келесі айда 20 килограмға ауыссам деймін. Басқа спорттық снарядттар бар. Әрқайсысы 70-80 кг. Мәселен, аяққа салмақ салу. Оның өзін 150 килограмнан бастау керек", - деді Тәліпбек Әлжанов.

Жастық шағында бокстан спорт шебері атанған Тәліпбек қария пауэрлифтингпен 30 жылдан бері айналысып келеді. Жасы ұлғайғанымен әлі күш қайраты қайтпаған қария жаттығу арасында бойында бұла күші бұлқынған жастармен қол күрестіріп алатыны да бар.

"Ол кісі базалық қимыл-жаттығуларымызды жасай береді. Кейбір жастар жасай алмайтын жаттығуларды жасайды", - дейді жаттықтырушы Дәурен Жандарбеков.

Тәліпбек Әлжанов – күш сайыстыру спортынан Қазақстаның 16 дүркін абсолютті чемпионы. Осыдан екі жыл бұрын әлемнің 40 елінен келген 600-ден астам спортшымен күш сайыстырып, алтын және күміс жүлде иеленген. Бұл сайыстарда ол 185 кг зілтемірмен еркін отырып-тұрып және 192 кг темірді жерден көтерген.

"Денсаулық, сонан соң спорттық күшіңді, талабыңды көрсетіп тұрсаңыз көпшілікке тәлім боласыз. Өйткені сізбен қатарлассам дейді. Бұл деген үлкен мақтаныш қой. Бұл деген адамдарды спортқа үгіттеудің бір түрі", - деді Әлжанов.

Сексен жасында сергек жүрген қария ұзақ жыл мәдениет саласында еңбек еткен жан. Театр да басқарған, облыстың мәдениет саласына да жетекшілік еткен.

Еске салайық, 74 жасында турникке тартылып танымал болған шымкенттік әжей спорттың арқасында ауруынан айыққанын айтқан еді.