Қайрат Боранбаев Қазақстан футбол федерациясы атқарушы комитетінің құрамына кірді. Бұл туралы KAZ.NUR.KZ ұйымның баспасөз қызметіне сілтеме жасап хабарлайды.
ҚФФ сайтындағы мәліметіне сәйкес, бүгін Астанада ҚФФ кезекті XXV конференциясы өткен. Онда ҚФФ Жарғысына өзгерістер мен толтықтырулар енгізу, қаржы есебін бекіту және ҚФФ атқарушы комитетінің құрамын өзгерту туралы мәселелер қаралған.
"Маңызды шешімнің алдында тұрмыз: Қазақстанда толыққанды футбол бизнес-индустриясын құру. Мақсатымыз – кәсіби футболды дамытып қана қоймай, оның айналасында тұрақты бизнес құру. Бүгінде халықаралық практиканы біздің нарыққа ыңғайлап, өз нарығымызды құрып жатырмыз. Бұл білікті футбол мамандарын дайындап, сапалы инфрақұрылым, медиаөнімдер мен трансферлік нарықты дамытуды талап етеді.
Мемлекет футболдың дамуына белсенді көмектесіп, оның қоғамдағы рөлінің маңызын мойындайды. Бұл ұлттың денсаулығына оң әсер тигізіп, қылмыс деңгейінің төмендеуіне ықпал етеді. Соңғы бір жылда біздің салған инвестициямыздан қоғамдық қайтарым 536 миллион еуроны құрап, 1,8 миллиард еуроға дейін өсу мүмкіндігін береді.
Мемлекет басшысы ел бойынша ірі стадиондарды салуды тапсырды. Осы арқылы инфрақұрылым мәселелері шешіледі. Ал біз өз тарабымыздан 100 пайыз дайын болуымыз қажет", - деді отырыста ҚФФ президенті Әділет Барменқұлов.
Бұдан бөлек, жиында ҚФФ құрамына жаңа қатысушыларды қабылдау мәселесі де қаралды. Сондай-ақ ҚФФ атқарушы комитет мүшелігіне "Қайрат" футбол клубынан Қайрат Боранбаев алынды.
Мақаланың түпнұсқасы: https://kaz.nur.kz/sport/other-sports/2182005-qairat-boranbaev-qazaqstan-futbol-federatsiiasyna-oraldy/
