Еркін күрестен әлем чемпионы Нұрқожа Қайпановқа кәсіпкер Ерлан Қожасбай көлік сыйлады. Бұл туралы KAZ.NUR.KZ тілшісі хабарлайды.
Ерлан Қожасбай спортшыны әлем біріншілігіндегі жеңісімен құттықтап, оған Zeekr 001 көлігінің кілтін табыстаған.
"Осындай нәтижеге жету үшін қанша тер төккеніңе, еңбек еткеніңе өзім куәмін. Саған және ата-анаңа рахмет. Сен нағыз батырсың. Күрес академиясының шәкірті екеніңе мақтанамыз", - деді кәсіпкер әлем чемпионымен кездесуінде.
Нұрқожа Қайпанов Тиранадағы (Албания) әлем біріншілігінің финалында жапон балуаны Ешиносуке Аоягині жеңіп, 70 кг салмақ дәрежесінде алтын медаль иеленген еді. Осылайша еркін күрестен әлем чемпионы атанған екінші қазақ балуаны атанды. Былтыр Сербия астанасы Белградта Ризабек Айтмұхан 92 кг дейінгі салмақта топ жарған болатын.
2019 жылы Нұрқожа Астанадағы әлем чемпионатында күміс медаль еншіледі. Сондай-ақ ол екі дүркін Азия чемпионы.
Еске салайық, Нұрқожа Қайпановтың спорттағы мансабы мен жетістіктері туралы жазғанбыз.
Мақаланың түпнұсқасы: https://kaz.nur.kz/sport/other-sports/2183900-nagyz-batyrsyng-alem-chempiony-nurqozha-qaipanovqa-kasipker-kolik-mingizdi-video/
