Елена Рыбакина әлемдік рейтингте үздік бестіктен шығып қалды

Әйелдер теннисі қауымдастығы (WTA) жекелей және жұптық сындағы рейтингті жаңартты. Қазақстанның бірінші ракеткасы Елена Рыбакина үздік бестіктен тыс қалды, деп хабарлайды KAZ.NUR.KZ.

Елена Рыбакина рейтингте 5-орыннан 6-орынға cырғыды. Бұған оның WTA қорытынды турниріндегі нәтижесі себеп болып отыр. Қазақстандық теннисші осы жарыста тек бір рет жеңіске жетіп, топтан шыға алмаған еді.

Тағы бір қазақстандық теннисші Юлия Путинцева рейтингтегі 29-орнын сақтап қалды. Ал тізімдегі топ-3 теннисші өзгерген жоқ. Белорусь спортшысы Арина Соболенко көш басында болса, польшалық Ига Швентек екінші орында, ал АҚШ өкілі Кори Гауфф үздік үштікті түйіндеп тұр.

Жұптық сында ойнайтын қазақстандық теннисші Анна Данилина 22-орында қалды. Чехиялық Катерина Синякова мен Жаңа Зеландия спортшысы Эрин Рутлифф жұптық рейтингте әлі де көшбасшы болып тұр. Ал канадалық Габриэла Дабровски украиналық Людмила Киченоктың орнына үшінші сатыға көтерілді.

Еске салайық, Елена Рыбакина Эр-Риядта (Сауд Арабиясы) өткен WTA қорытынды турнирінде қанша табыс тапқанын жазған едік.

Мәтіннен қате тапсаңыз, бізге жазыңыз