Қазақстандық спортшы антидопинг ережелерін бұзғаны үшін жазаланды

Қазақстандық самбошы Анар Сейтімова антидопинг ережелерін бұзғаны үшін үш жылға дисквалификация алды. Бұл туралы KAZ.NUR.KZ Халықаралық самбо федерациясының ресми сайтына сілтеме жасап хабарлайды.

Федерацияның ресми сайтындағы ақпаратқа сүйенсек, Анар Сейтімованың сынамасынан мельдоний препаратының ізі табылған. Енді қазақстандық спортшы 08.08.2024 – 07.08.2027 жылдар аралығында жарыстарға қатыса алмайды.

35 жастағы Сейтімова биыл шілдеде Қытайдың Макао қаласында өткен Азия және Тынық мұхиты аймағының чемпионатында жауынгерлік самбодан +80 кг салмақта бақ сынап, алтын медаль иеленген еді. Ол бұрын дзюдодан Қазақстан әйелдер құрамасында өнер көрсетіп, әлем кубогы кезеңінің жеңімпазы, Еуропа кубогінің қола жүлдегері атанған.

Еске салайық, қазақстандық триатлоншы Әбусейіт Әлихан допинг қолданғаны үшін 3 жылға дисквалификация алған еді. Оның сынамасынан эритропоэтин препараты табылған. Спортшы 2024 жылдың 5 тамызынан 2027 жылдың 5 тамызына дейін жарыстардан шеттетілді.

Мәтіннен қате тапсаңыз, бізге жазыңыз