Өзбекстан президенті Шавкат Мирзиеев елдің Ұлттық Олимпиада комитетінің төрағасы болып сайланды. Бұл туралы KAZ.NUR.KZ Өзбекстан ҰОК-ның ресми сайтына сілтеме жасап хабарлайды.
25 қарашада Өзбекстан Ұлттық Олимпиада комитетінің кезекті бас ассамблеясы өтті. Жиында комитеттің жаңа басшысы қызметіне ел президенті Шавкат Мирзиеев ұсынылып, барлық делегат оның кандидатурасын бір ауыздан қолдады. Осылайша Мирзиеев Өзбекстан Ұлттық Олимпиада комитетінің төрағасы атанды.
Сонымен қатар комитет төрағасы орынбасарларының құрамы жасақталды. Оған сәйкес, Азия Олимпиадалық кеңесінің вице-президенті Отабек Омаров төрағаның бірінші орынбасары, Ойбек Қасымов – бас хатшы, Шерзод Ташматов – ҰОК төрағасының орынбасары болып сайланды. Іс-шара барысында комитеттің жаңартылған жарғысы бекітілді.
Еске салайық, биыл 26 ақпанда Қазақстан Ұлттық Олимпиада комитетінің президенті болып Геннадий Головкин сайланған еді. 2015 жылдан бері бұл қызметті Тимур Құлыбаев атқарған болатын.
Мақаланың түпнұсқасы: https://kaz.nur.kz/sport/other-sports/2192405-ozbekstan-ulttyq-olimpiada-komitetin-shavkat-mirzieevting-ozi-basqaratyn-boldy/
