Тарихи жеңіс: Елена Рыбакина алғаш рет WTA қорытынды турнирінің жеңімпазы атанды

Қазақстанның бірінші ракеткасы, әлемнің 6-ракеткасы Елена Рыбакина мансабында алғаш рет WTA маусымының қорытынды турнирінің чемпионы атанды. Бұл туралы KAZ.NUR.KZ хабарлайды.

Сауд Арабиясының астанасы Эр-Риядта өткен финалдық ойында Елена Рыбакина әлемнің бірінші ракеткасы, "Үлкен дулыға" турнирлерінің төрт дүркін чемпионы, Беларусь өкілі Арина Соболенкомен кездесті.

Матч екі сет бойы жалғасып, екіншісі тай-брейкпен аяқталды. Тартысты кездесу нәтижесінде қазақстандық теннисші 6:3, 7:6 (7:0) есебімен жеңіске жетті.

Рыбакина 13 эйспен бірге 6 брейк-пойнттың біреуін өз есебіне жазды. Соболенко 5 эйс жасағанымен, 5 брейк-пойнтты пайдалана алмады. 

Осылайша, Елена Рыбакина мансабында алғаш рет WTA қорытынды турнирінің жеңімпазы атанды. Бұған дейін отандық спортшы бұл жарысқа екі мәрте қатысып, топтан шыға алмаған болатын.

Оған қоса, Рыбакина 1972 жылдан бері аталмыш жарыста чемпион атанған алғашқы азиялық теннисші болды.

Мәтіннен қате тапсаңыз, бізге жазыңыз