Пәкістанда базарда жарылыс болды: қаза тапқандар бар (видео)

Пәкістанның Белуджистан провинциясының Бархан қаласындағы базарда болған жарылыс салдарынан кем дегенде төрт адам қаза тауып, тағы 12 адам жарақат алды, деп хабарлайды KAZ.NUR.KZ Geo News сайтына сілтеме жасап.

Полицияның мәліметінше, жарылыс Рахни базары аймағында болған. Зардап шеккендердің барлығы ауруханаларға жеткізілді.

"Кем дегенде төрт адам қаза тауып, тағы 12 адам жарақат алды", – делінген полиция хабарламасында.

Полиция алдын ала мәлімет бойынша жарылысқа мотоциклге орнатылған қолдан жасалған жарылғыш зат себеп болғанын айтты.

Сондай-ақ жарылыс салдарынан бірнеше көлік, мотоцикл және дүкендерге зақым келгені атап өтілді.

Қауіпсіздік күштері оқиғадан кейін аумақты қоршауға алып, көлік қозғалысын толығымен тоқтатты.

Премьер-министр Шехбаз Шариф жарылысты ұйымдастырушыларды айыптап, жергілікті билікке қылмыскерлерді ұстау үшін барлық шараларды қабылдауды тапсырды.

"Террористер жазадан құтыла алмайды", – деді ол.