Қырғызстанда жеке куәлікке әкесінің атының орнына анасының есімін көрсетуге рұқсат етілді

Қырғызстанда Конституциялық соттың Сот алқасы 16 жастан бастап жеке куәлікте әкесінің атының орнына анасының есімін қолдануға рұқсат берді, деп хабарлады жергілікті белсенді Алтын Қапалова өзінің Facebook парақшасында.

Алтын Қапалованың айтуынша, сот шешімі бойынша кез келген ересек қырғыз азаматы жеке куәлігінде әкесінің атының орнына анасының есімін көрсете алады.

"Қырғыз Республикасының Конституциялық сотының шешімі бойынша министрлер кабинеті даулы нормаларды тексеру шеңберінде анықталған құқықтық тетіктің орнын толтыруға, сондай-ақ теңдік қағидаттарын бұзуға және жынысы бойынша кемсітуге жағдай туғызатын құқықтық тетікті толықтыруға бағытталған қолданыстағы құқықтық реттеуге тиісті өзгерістер енгізу керек. Осылайша (енді азамат жеке куәлікте - ред. түсіндірмесі) анасының атын да көрсетуге құқығы бар. Шешім қабылданды", - деп жазады ол.

Соттың бұл шешімі шағымдануға жатпайтыны және ол жарияланған сәттен бастап заңды күшіне енетіні атап өтілген.

"Шешім барлық мемлекеттік органдар, жергілікті өзін-өзі басқару органдары, лауазымды тұлғалар, қоғамдық бірлестіктер, заңды және жеке тұлғалар үшін міндетті және республиканың барлық аумағында орындалуға тиіс", - деп толықтырды сот.

Бірақ Конституциялық сот 16 жасқа толмаған балаларға анасының атын көрсетуге тыйым салу туралы шешім шығарған.