"Өзін "Жаңа Құдай" санайды": Қырғызстанда "Қыс болмайды" деп ұрандатқан белсенді ұсталды

Қырғызстанда мемге айналған "Қыс болмайды" деген сөз тіркесінің авторы, белсенді Арстанбек Абділдаев діни араздықты қоздырды деген күдікпен ұсталды. Бұл туралы KAZ.NUR.KZ тілшісі 24.kg сайтына сілтеме жасап хабарлайды.

Қырғызстан Ұлттық қауіпсіздік мемлекеттік комитетінің мәліметінше, Арстанбек Абділдаев деген атпен белгілі Арстан Алайды ведомство қызметкерлері ұстаған. Оған қатысты Қырғыз Республикасы Қылмыстық кодексінің 330-бабы "Діни араздықты (алауыздықты) қоздыру" бойынша қылмыстық іс қозғалды.

Құзырлы орган Әбділдаевтың әлеуметтік желілерде кітаптар мен брошюраларда діни және дінаралық араздықты қоздыруға үндеу жариялағанын, сондай-ақ азаматтардың жеке басын діни негізде пайдаланғанын мәлім етті.

"Ол өзін "Жаңа Құдай", "Құтқарушы" санайды және басқа дінді, сенім мен көзқарасты төмен, адасушылық деп санап, оларға теріс баға береді", - деді Қырғызстан Ұлттық қауіпсіздік комитетінің өкілдері.

Басылым мәліметінше, Арстан Алайдың үйінен көптеген әдебиет, компьютер және басқа да электронды ақпарат құралы тәркіленген.

Қазір ер адам Ұлттық қауіпсіздік комитетінің тергеу изоляторына қамалды.

Осыған дейін Арстан Алай кейінгі екі күнде хабар-ошарсыз кетті деген ақпарат шыққан еді. Туыстары оның 13 желтоқсанда үйінен шығып кеткенін және оралмағанын хабарлады.