Украина Белгородқа соққы жасады: 20 адам қаза тапқаны хабарланды

Белгородқа жасалған шабуылдан қаза тапқандар саны 20-ға жетті. Бұл мәлімет ресейлік ТЖМ Telegram-арнасында жарияланды.

"Нақтыланған ақпаратқа сәйкес, Белгородта қаза тапқандар саны 20-ға жетті", - делінген хабарламада.

Бұған дейін Белгород облысының губернаторы Вячеслав Гладков Украинаның Белгородқа зымыран соққысынан 14 адам қаза болғанын, олардың арасында үш бала барын айтқан. 108 адам жарақат алды, оның ішінде 15 бала бар. 5 бала мен 12 ересек адамның жағдайы ауыр.

Гладков бұл цифрларды жедел штаб отырысынан кейін жария етті, онда күш құрылымдарының басшылары соққының салдары туралы хабарлады. Сағат түстен кейінгі 16:00-ден кейін Белгородта жарылыстар болған.

Куәгерлердің видеоларында бірнеше секунд аралықпен екі қатты жарылыс болғанын көруге болады, онымен қатарласқан көптеген кішігірім жарылыстар естілген. Қирау кадрларының көп бөлігінде қала орталығындағы "Белгород" әмбебап дүкенінің көпқабатты ғимаратының жанындағы жағдай көрсетілген.

"Бүгінгі таңда бізде 100-ден астам көлік бүлінгені туралы ақпарат бар, олардың көпшілігі толығымен жойылған - өртеніп кетті. Қирау деректері 22 көппәтерлі үйде, көптеген коммерциялық нысандарда, сауда орталықтарында, дүкендерде анықталды. Залалды бағалау жалғасып жатыр", - деді кейінірек Вячеслав Гладков.

БҰҰ Қауіпсіздік кеңесінің шұғыл отырысы

Сенбіде Нью-Йоркте Ресейдің өтініші бойынша БҰҰ Қауіпсіздік кеңесінің шұғыл отырысы өтті. Ресей оған Чехия өкілін шақырғанын мәлімдеді.

Би-би-си Ресейдің чех оқ-дәрілерін пайдалану туралы талаптарын тексеріп, растай алмайды.

Кездесу барысында Ресейдің БҰҰ-дағы өкілі Василий Небензя Украинаны "бейбіт нысандарға қасақана, бей-берекет шабуыл жасады" деп айыптады.

Оның сөздерін Украинаның одақтастары жоққа шығарды: француз елшісі Украина БҰҰ заңдарына сәйкес өзін қорғап жатыр деп мәлімдеді, ал басқа спикерлер, соның ішінде АҚШ пен Ұлыбритания өкілдері президент Владимир Путин бұл қақтығысты бастағаны үшін ресейліктердің өліміне жауапты деп мәлімдеді.

БҰҰ бас хатшысының көмекшісі Мохамед Хиари қос тараптың да шабуылдарын үзілді-кесілді айыптап, бейбіт тұрғындар мен азаматтық инфрақұрылымға жасалған соққылар "халықаралық гуманитарлық құқықты бұзады, орынсыз және дереу тоқтатылуы керек" деп мәлімдеді.

Ресейдің Қорғаныс министрлігі өзінің Telegram-арнасында "Белгород қаласына тыйым салынған кассеталық жабдықта екі "Алдер" зымыранымен, сондай-ақ Чехияда шығарылған Vampire реактив снарядтарымен таңдап-талғамай соққы жасады" деп мәлімдеді.

Қорғаныс министрлігінің хабарламасында "егер "Алдер" зымырандары қала бойынша кассеталық оқ-дәрілермен тікелей соғылса, оның салдары өлшеусіз ауыр болар еді" делінген, дегенмен ресейлік әуе қорғанысы атып түсірген снарядтар мен зымырандардың бір бөлігі қалаға құлаған.

Ресей президентінің баспасөз хатшысы Дмитрий Песков Владимир Путиннің тапсырмасы бойынша министр Михаил Мурашко бастаған Денсаулық сақтау министрлігінің бригадасы Белгородқа аттанғанын хабарлады. Сонымен қатар зардап шеккендерге көмек көрсету үшін ТЖМ тобы жіберілген.

Шабуыл нысанына айналған Белгород облысы

Белгород облысы бір жылдан аса уақыт бойы Украинаның соққыларына ұшырап жатыр, биылдың жазында билік Украинамен шекаралас елді мекендерді эвакуацияланатынын жариялады.

Бұл - Белгородқа бір тәуліктен аз уақыт ішінде жасалған екінші соққы. Жұманың кешінде губернатор Гладков атыс салдарынан бір ер адам қаза тауып, бірнеше адам жарақат алғанын хабарлады. Сол кезде, Гладковтың айтуынша, тұрғын аудандарда жақын маңдағы тағы бірнеше елді мекенге оқ атылған.

Белгород Украинамен шекарадан 30 шақырым жерде орналасқан, мұнда атыс жиі болып тұрады, бірақ мұндай күшті соққылар бұған дейін болмаған. Шекараға жақын елді мекендерде үнем атыс болып тұрады, биылдың жазында аймақ билігі Украинадан 5-7 километр қашықтықта орналасқан ірі Шебекино қаласын эвакуациялады.

Украина уәжі

Украина билігі сенбідегі атыс туралы ресми пікір білдірген жоқ. Алайда жұма күнгі соққылардан кейін Украинаның барлау агенттіктерінің дереккөзі "Суспiльне" қоғамдық хабар таратушысына Украина тек әскери нысандарға соққы жасағанын, ал қирау мен құрбандар ресейлік әуе қорғанысының нашар жұмысының нәтижесі болғанын, зымырандардың сынықтары Белгородқа құлағанын мәлімдеді.

Бірақ басылымға сұхбат бергендер бұл соққылар жұманың таңында Украинаның бірнеше қаласына жасалған ресейлік шабуылдарға жауап әрекеті болғанын мәлімдеді.

Украина президенті Владимир Зеленскийдің айтуынша, бұл соққыдан ірі қалаларда адам шығыны болған — Киев, Днепр, Запорожье, Львовта кем дегенде 39 адам қаза тапқан.

Кейінірек Украинаның қауіпсіздік қызметіндегі дереккөз Би-би-сиге Киевтің сенбідегі Белгородқа қарсы шабуылдарды жасағанын растады. Әдетте Украина билігі Ресей аумақтарын бомбалауға жауапты екенін ресми түрде растамайды.

Дереккөз бұл шабуылдардың мақсаты тек әскери инфрақұрылым деп мәлімдеді, алайда ол бейбіт тұрғындарды қазаға ұшыратуға "ресейлік әуе қорғанысының қабілетсіз жұмысы" себеп болды деп айыптады. Оның айтуынша, украиналық шабуылдар жұманың кешінде басталған. Дереккөз Украина Ресейдегі нысандарға қарсы 70-тен астам дрон ұшырғанын айтып, бұл "Ресейдің Украина қалалары мен бейбіт тұрғындарға жасаған террорлық шабуылдарына жауап" деп мәлімдеді.