Мексикада сайлау алдындағы митингте сахна қира: зардап шеккендер саны артты

Мексика президенттігіне үміткер Хорхе Альварес Майнестің үгіт-насихат митингісі кезінде сахна қирап, тоғыз адам қайтыс болған, 63 адам түрлі жарақат алды. Бұған дейін 50 адам зардап шеккені хабарланған. Бұл туралы The Guardian басылымына сілтеме жасаған KAZ.NUR.KZ хабарлайды.

Мексика президенті Андрес Мануэль Лопес Обрадор елдің солтүстігіндегі Нуэво-Леон штатындағы Сан-Педро-Гарса-Гарсия қаласындағы апатқа екпінді жел себеп болғанын айтты.

Президенттікке үміткер Майнестің өзі де ауруханаға түскен.

"Менің жағдайым жақсы. Қазір ең маңыздысы – төтенше жағдайдан зардап шеккендерге қамқорлық жасау", - деді Хорхе Альварес Майнес.

Әлеуметтік желіде тараған видеоға қарағанда, Майнес сахнада тұрған, сәлден кейін экран мен металл конструкция құлай бастаған. Майнес сахнаның бір бөлігі құлағанға дейін қашып үлгерген.