Нигерияда бір күнде үйлену тойында, ауруханада және жерлеу рәсімінде жарылыс болып, 18 адам қаза тапты

Кеше Нигерия штаттарының бірінде әртүрлі жерде бірнеше жарылыс болды. Әзірге 18 адам қаза тауып, 48 адам жараланғаны хабарланды, деп мәлімдеді CNN арнасы.

Төтенше жағдайлар қызметінің мәліметінше, Нигерияның солтүстік-шығысындағы Борно штатындағы жарылыс салдарынан кемінде 18 адам қаза тауып, 48 адам жарақат алған.

Алғашқы жарылыс 29 маусым, сенбі күні жергілікті уақыт бойынша сағат 15:00 шамасында үйлену тойында болғаны хабарланды. Содан кейін тағы бір жарылыс Гвоза (жергілікті үкімет аймағы) ауруханасында, ал үшінші жарылыс жерлеу рәсімінде болған.

Борно штатының төтенше жағдайлар жөніндегі агенттігінің (SEMA) мәліметінше, қаза тапқандар арасында ерлер, әйелдер және балалар бар.