Харрис Трамппен пікірталасқа дайын екенін айтты

АҚШ президенттігіне үміткер Камала Харрис қарсыласы Дональд Трамппен 10 қыркүйекте дебат өткізуге дайын екенін айтты. Харрис бұл мәселеде қарсыласы артқа шегінді деп есептейді.

Бұған дейін Трамп пен Байден арасындағы пікірталастардың екінші раунды 10 қыркүйекте өтеді деп жоспарланған болатын, бірақ Байден сайлауға қатыспайтынын мәлімдеді, деп жазады РИА Новости.

"Ол бұған дейін келіскен, енді артқа шегінген сияқты. Бірақ мен дайынмын", - деді Харрис журналистерге.

Айта кетейік, пікірсайыс ABC арнасында 10 қыркүйекте өтуі керек еді. Байден жарыстан шығып қалғаннан кейін, Трамп командасы Демократиялық партия кандидатының өзгеруіне байланысты ABC дебатына қатысуға кепілдік бере алмайтынын айтты.

Сонымен қатар үміткерлерге Fox News арнасы 17 қыркүйекте пікірталас алаңын ұсынды.

Айта кетейік, Камала Харрис АҚШ президенттігіне үміткер екенін ресми түрде жария етті.

Еске салайық, 22 шілдеде АҚШ-тың қазіргі президенті Джо Байден президенттік сайлаудан бас тартқанын мәлімдеді. Ол сайлауда АҚШ вице-президенті Камала Харристі қолдайтынын айтқан.

Бұған дейін АҚШ президенті Джо Байден коронавирус жұқтырып, емделіп жатқанын жазған едік.

Джо Байден соңғы кездерде түрлі қылық көрсетіп жүргені мәлім. Мәселен, радиолардың біріне берген сұқбатында АҚШ-тың қазіргі президенті "қара нәсілді президент елді басқарған кезде жұмыс істеген алғашқы қара нәсілді әйел болғанын мақтан тұтатынын" айтты.