Исландияда жанартау атқылап, лава ақты: төтенше жағдай жарияланды (видео)

Исландия түбегінде жанартау атқылап, лава ақты. Табиғат құбылысына байланысты өңірде төтенше жағдай жарияланды, деп хабарлайды Sky News арнасына сілтеме жасаған KAZ.NUR.KZ.

Басылым мәліметінше, Исландияның оңтүстік-батысында орналасқан Рейкьянес түбегінде жанартау атқылаған. Бірнеше күн бұрын метеорологтар Сунднукар жанартауында сейсмикалық белсенділік пен жер сілкінісін тіркеді. Аймақта төтенше жағдай жарияланды.

Мұнда 2023 жылғы желтоқсаннан бері жанартау атқылап жатыр. Содан бері жақын маңдағы Гриндавик қаласының 4 мыңға жуық тұрғыны эвакуацияланды.

Бұл қаланың солтүстігінде лава шығыс пен батысқа қарай ағатын жарықшақ пайда болды. 10 минут ішінде лава ағыны шамамен 1 километр жерге жайылған. Бұл ретте жарықтың жалпы ұзындығы шамамен 3,9 километрге жетті.

Аққан лаваның видеосы X әлеуметтік желісінде RUV English парақшасында жарияланды.