Ердоған БҰҰ Бас ассамблеясында Нетаньяхуды Гитлермен салыстырды

Түркия президенті Режеп Тайип Ердоған Біріккен ұлттар ұйымының Бас ассамблеясында сөйлеген сөзінде Таяу Шығыстағы жағдай туралы айтты. Бұл туралы KAZ.NUR.KZ хабарлайды.

Түркия басшысы Израиль премьер-министрін сынап, оны Адольф Гитлермен салыстырды, деп жазады РИА Новости.

"Халықаралық қауымдастық палестиналық бейбіт тұрғындарды израильдік әрекеттерден қорғау механизмін әзірлеуі керек. Гитлерді 70 жыл бұрын адамзат альянсы тоқтатқаны сияқты, Нетаньяху мен оның қанды желісін де "адамзат одағы" тоқтатуы керек", - деді Ердоған өз сөзінде.

Айта кетейік, Ердоған бұған дейін де Израиль басшылығын сынаған болатын.

Наурызда Түркия президенті Режеп Тайип Ердоған Газадағы жағдай туралы пікір білдіріп, Таяу Шығыста болып жатқан жағдайды "геноцид" деп атады.

Ал 2023 жылғы желтоқсанда Түркия мен Израиль басшылары бірін-бірі айыптады. Ердоған Нетаньяхуды Гитлермен салыстырды, Израиль премьер-министрі бұл сөзге жауап берді.

Биньямин Нетаньяху сол кезде: "Күрдтерге қарсы геноцид жасап жатқан, оның билігіне қарсы шыққан түрмедегі журналистердің саны бойынша әлемдік рекорд орнатқан Ердоған – бізге мораль "оқитын" соңғы адам", - деп жауап берді.

Бұған дейін Түркия президенті "БҰҰ-ны әрекетке қабілетсіз" ұйым деп атап, оның құрылымын өзгертуге шақырды.

2023 жылғы күзде Газадағы оқиғаларға байланысты Түркия Израильдегі елшісін қайтарып алды.