ЦАХАЛ "Хезболланың" барлау штабына шабуыл жасады

Израиль қорғаныс күштері (ЦАХАЛ) Бейруттегі Ливан "Хезболла" қозғалысының барлау штабына соққы бергенін мәлімдеді. Бұл туралы "РИА Новости"-ге сілтеме жасаған KAZ.NUR.KZ хабарлайды.

ЦАХАЛ баспасөз қызметінің мәліметінше, Израиль қорғаныс күштерінің жойғыш ұшақтары Бейруттегі "Хезболла" штаб-пәтеріне тиесілі лаңкестік нысандарға, соның ішінде барлау мәліметтерін жинау нысандарына, командалық орталықтарға және басқа да инфрақұрылымдарға барлау негізіндегі соққылар жасады.

Израиль армиясы соңғы бірнеше сағат ішінде елдің әскери-әуе күштері Бейрут аймағындағы "Хезболла" қару-жарақ қоймаларына соққы жасағанын хабарлады.

"Соққылардан кейін қайталама жарылыстар тіркелді, бұл қару бар екенін көрсетеді", - деп мәлімдеді Израиль армиясы өкілдері.

Айта кетейік, Таяу Шығыстағы жағдай қайта ушықты. Дүйсенбіде кешке Израиль Ливанда құрлықтағы әскери операция басталғанын жариялады. Ал кеше, 1 қазанда Иран Израиль аумағына жүздеген зымыран ұшырды. Шабуылдың салдары туралы нақты ақпарат жоқ.

Израиль премьер-министрі Биньямин Нетаньяху бұл оқиғаға жауап берді. Ол Иранның зымыран шабуылын "үлкен қателік" деп атап, жауап қайтаруға уәде берді.