"Саясат – қатал іс": Ақ үйде Трамп пен Байден кездесті (фото)

Дональд Трамп Байденмен кездесу үшін Ақ үйге барды. Бұл жөнінде KAZ.NUR.KZ хабарлайды.

CNN сайтында жарияланған ақпарат бойынша, Дональд Трамптың Ақ үйге бұл жолғы сапары – оның бұрынғы президенттік мерзімінен бергі алғашқы баруы.

Кездесу барысында қазіргі президент Джо Байден жаңадан сайланған президент Дональд Трампқа билік "бірқалыпты ауысады" деп үміттенетінін айтты.

Сондай-ақ ол қаңтарда Ақ үйге оралған кезде ізбасарына қолайлы жағдай жасайтынын айтты.

"Ал, сайланған президент, бұрынғы президент Дональд мырза, құттықтаймын", - деді Байден Трамп оның қасына отырған кезде.

Байден жаңа сайланған президентті жылы қарсы алып, екі көшбасшы қол алысты.

"Саясат – қатал іс әрі көп жағдайда жағымсыздау әлем, бірақ бүгін бұл тамаша әлем және мен оны бағалаймын", - деп жауап берді Трамп Байденге.

Еске салсақ, 5 қарашада АҚШ-та президент сайлауы өтіп, онда Дональд Трамп айқын жеңіске жеткен болатын. Ол 47-президент атанды және бұл оның екінші президенттік мерзімі де болмақ. Президент Қасым-Жомарт Тоқаев бастаған әлем көшбасшылары Трампты сайлаудағы жеңісімен құттықтады.