Украина делегациясы алғаш рет Трамп командасымен келіссөз жүргізді

Вашингтонда украин делегациясы АҚШ-тың болашақ әкімшілігінің мүшелерімен кездесті. Бұл туралы KAZ.NUR.KZ РБК сайтына сілтеме жасай отырып хабарлайды.

Басылым ақпаратынша, Украина президенті кеңсесінің жетекшісі Андрей Ермак бастаған делегация Вашингтонда Дональд Трамп әкімшілігінің ұлттық қауіпсіздік жөніндегі болашақ кеңесшісі Майк Уолцпен және Украина жөніндегі арнайы өкіл Кит Келлогпен жүздескен.

Ал The Wall Street Journal (WSJ) дереккөздерінің мәліметінше, келіссөздерге АҚШ-тың болашақ вице-президенті Джеймс Дэвид Вэнс те қосылған. Басылым дерегінше, Келлог президент Джо Байден әкімшілігінің Украинаға тезірек қару жеткізу ұмтылысын қолдаған. Келлогтың пікірінше, Трамп оны жанжалды реттеу үшін Мәскеуге ықпал көрсету тетігі ретінде қолдана алады.

Дональд Трамп 5 қарашадағы президент сайлауында жеңіске жетті. Жаңа президентті ұлықтау салтанаты 20 қаңтарда өтеді. Трамп Украинадағы жанжалды келіссөздер арқылы аяқтауға уәде берген. Әзірге соған қатысты бейбітшілік жоспары жарияланған жоқ.