Макрон Франция үкіметінің отставкасын қабылдады

Франция президенті Эмманюэль Макрон республика премьер-министрінің министрлер кабинетін отставкаға жіберу туралы өтінішін қабылдады. Бұл туралы KAZ.NUR.KZ Елисей сарайына сілтеме жасап хабарлайды.

"Премьер-министр бүгін республика президентіне өз үкіметін отставкаға жіберу туралы өтініш берді. Ол мұны қабылдады. Мишель Барнье үкімет мүшелерімен бірге жаңа үкімет тағайындалғанға дейін өз міндеттерін орындайды", - делінген президент резиденциясының Х желісіндегі мәлімдемесінде.

Еске салсақ, бұған дейін Франция үкіметіне 60 жылда алғаш рет сенімсіздік вотумы жарияланған болатын.

4 желтоқсанда Франция ұлттық жиналысы Мишель Барнье кеңсесіне сенімсіздік вотумын жариялап, дауысқа салды. Парламенттегі екі партия – "Ұлттық бірлік" және "Жаңа халық майданы" үкіметке сенімсіздік білдіріп, осындай ұсыныс тастады. Парламенттегі 577 депутаттың 331-і бастаманы қолдады.