Трамп инаугурациясына дейін Украинаға АҚШ-тан 20 млрд доллар мен әскери көмек берілмек

Украина президенті кеңсесінің басшысы Андрей Ермак Вашингтонда АҚШ президентінің ұлттық қауіпсіздік жөніндегі кеңесшісі Джейк Салливанмен кездесті. Жүздесуде Салливан Киев Трамп инаугурациясына дейін АҚШ-тан 20 млрд доллар мен әскери көмек алатынын мәлімдеді. Бұл туралы KAZ.NUR.KZ CNN телеарнасына сілтеме жасай отырып хабарлайды.

Құрама Штаттар 20 млрд долларды несие түрінде береді, бірақ оны бұғатталған ресейлік активтер есебінен өндіріп алады. Осы мәселеге қатысты келіссөздер аяқталды десе де болады.

Мәліметтерге қарағанда, АҚШ-тың кезекті әскери көмегіне "жүздеген мың қосымша артиллериялық снаряд, мыңдаған зымыран, жүздеген берен техника" кіреді. Бұған қоса АҚШ жауынгерлерді Украинадан тыс аймақтардағы нысандарға оқытуды көздеп отыр.

Биыл күзде президент сайлауында жеңіске жеткен Дональд Трамп 2025 жылғы 20 қаңтарда билікке келеді. Сол кезде америкалық әкімшіліктің Украинадағы соғысқа қатысты бағыты өзгеруі мүмкін. Трамп жанжалды келіссөздер арқылы аяқтауға уәде берген, алайда бейбітшілік жоспарын әлі жариялаған жоқ. Бұл уақытта Джо Байден әкімшілігі Трамп инаугурациясына дейін Украинаға көмектесіп үлгеруге тырысып жатыр.

Осының алдында CNN телеарнасының дереккөздері Вашингтонда жүрген Андрей Ермак вице-президент болып сайланған Джей Ди Вэнспен, Трамптың болашақ кеңесшісі Майк Уолтцпен кездесіп, Украина мен майдандағы жағдайды талқылағанын хабарлады. Вэнс пен Уолтц кездесудің көп уақытын Ермакты "тыңдаумен өткізді", деп жазды CNN.

Мәтіннен қате тапсаңыз, бізге жазыңыз